Արարատ Ղուկասյանի «Փնտրտուքների ճանապարհին» բանաստեղծությունների ժողովածուն շարունակում է իր ճանապարհորդությունը: Վերջերս Դանիայում տեղի ունեցած շնորհանդեսից հետո, նմանատիպ միջոցառում իրականացվեց նաև Ֆինլադիայի մայրաքաղաք Հելսինկիում՝ տեղի հայ համայնքի նախաձեռնությամբ: Այս մասին «Հայերն այսօր»-ին հայտնում են «Արարատ» հայկական միությունից:
Շնորհանդեսին ներկա էին համայնքի շուրջ 40 ներկայացուցիչներ: Բացման խոսքով հանդես եկավ Ռուզաննա Ղուկասյանը, ով հակիրճ ներկայացրեց հեղինակին և ժողովածուի անցած ճանապարհը:
Այնուհետև խոսքը տրվեց բանաստեղծ Արարատ Ղուկասյանին, ով հանգամանորեն ներկայացրեց գիրքը և այն գրելու մտահղացման պատճառները: Հեղինակը խոսեց մանկության հուշերի, մայրական սիրո, հայրական խրատների, հայերնիքի կարոտի, բնության, սիրո մասին, զգացմունքներ և երևույթներ, որոնք տեղ են գտել ժողովածուի էջերում: Հենց նույն էջերից ասմունքներ հնչեցին մայր և որդի Ռուզաննա և Դանիլա Ղուկասյանների կատարմամբ:
Ներկաները մեծ բավականություն ստացան հանդիպումից՝ բանստեղծի «Փնտրտուքների ճանապարհին» որոնելով ու գտնելով նաև հենց իրենց անցած հուշերը, իրականություն դարձած ու կորսված երազները, ծնողական սերն ու հայրենի տան կարոտը:
Արարատ Ղուկասյանը, ով նաև ներկայացնում է իսպանահայությանը, խոսեց նաև տեղի հայ համայնքի և հայկական հետքի մասին: Ֆինլանդահայ համայնքը նպատակադրվեց այսուհետ ավելի հաճախակի կազմակերպել նմանատիպ հանդիպումներ՝ խթանելու համար միջհամայնքային փոխհարաբերությունները:
